Уруг үш харлап чорааш, бажын кыргытканда, даай-авазының бергени төрүүр өшкүзүнүң өң-чүзүнүн ыяк билип алыр.
Беш харлаан кыс уруунга авазы дыйтылаа хууң бээр. Ол уруг өнчүге алган өшкүзүн беш харлыындан эгелеп саап, ажыглай бээр.
Чеди харлаан кыс уруг өг иштин туужуур-биле аштап турар апаар.
Тос хар чеде берген уругга өшкү, хой, инек сагдырып өөредир.
Үш харлыг оол уруг
Оол үш харлап чорааш, даайының бергени кулунунуң өң-чүзүнүн ыяк билип алыр.
Беш харлаан оол уругга адазы кижи хүлбүс мойнаандан кылган сөдүргени берип каар. Беш харлыг оол сөдүргези-биле дезиг бызааны шалбалап өөренир.
Чеди харлаан оол адазынга эш апаар. Буга бажын дагаан черге чеди харлыг оглун адазы ушкарып чедире бээр.
Тываның улустуң чогаалчызы, төөгү эртемнериниң доктору М.Б.Кенин-Лопсанның “Тыва чаңчыл” деп номундан.
