Эң-не буянныг болгаш хөй кижи киржилгелиг хемчеглерниң бирээзинге “Шиви адаанда белек” деп акция хамааржыр. Бо акцияны Тываның күрүне университединиң сургуулдары чогааткан.
Декабрь айның сөөлгү хүннеринде идепкейлиг сургуулдар хөй ажы-төлдүг база эвээш орулгалыг өг-бүлелерниң ажы-төлүнге Чаа чылдың белектерин үлээри чаңчыл апарган. Чаа чыл бүдүүзүнде Соок-Ирей болгаш Харжыгаштан белектер алырын уруг бүрүзү күзээр болгай, ынчалза-даа чамдык өг-бүлелерде ындыг арга чок. Ындыг байдалды сургуулдар эки билир болгаш, хөй чаштар белектер алзын дээш кызыдарлар. Бо удаада сургуулдар 70 уруггга белектерни сөңнеп, өөрткен. ТывКУ-нуң удуртулгазы болгаш башкылары сургуулдарның буянныг чоруун деткип турар.
ТывКУ-нуң аныяктар политиказының удуртулгазы Кызыл хоорайның мэриязынче хөй ажы-төлдүг база эвээш орулгалыг өг-бүлелерниң даңзызын бээрин дилээн. Ооң-биле чергелештир университетте белектер чыыр ажыл кидин түлүк чоруп турар.
Сургуулдар боттары Соок-Ирей база Харжыгаш кылдыр кеттинип алгаш, чаштарга байырланчыг байдалды тургузуп турар.
“Шиви адаанда белек” деп акция аныяктарны буянныг ажылдар кылырынга өөредип турар. Ук хемчег соонда, боттарын аас-кежиктиг кижилер кылдыр санап, сагыш-сеткилинге оожургал, чырыткы тыптып кээр дээрзин сургуулдар чугаалаар.
