«Дефектология терминнериниң орус-тыва тайылбырлыг словарын» Национал школа хөгжүдер институт бөгүн чырыкче үндүрген. Бо словарь Тываның ниити билигниң база тускай хевирниң школаларының төөгүзүнде бир дугаар үнген өөредилге-тайылбырлыг үндүрүлге болур.
Канчаар-даа аажок үнелиг ажылды тускай хевирниң школаларынга хөй чылдарда ажылдап келген арга-дуржулгазынга даянып, дефектолог-логопед башкылар Алевтина Ондар, Кызыл-оол Түлүш ажылдап кылганнар. Үндүрүлгениң редактору — Тываның күрүне университединиң тыва филология болгаш ниити дыл эртеминиң кафедразының улуг башкызы Мария Күжүгет.
Словарьда дефектология эртеминде калбаа-биле ажыглаттынып турар тускай терминнерни орус дылда хевири-биле кииргеш, оларның тайылбырын тыва дылче очулдурган.
«Дефектология терминнериниң орус-тыва тайылбырлыг словары» республиканың ниити билиг база тускай хевирниң школаларының башкыларынга, уруглар садтарның кижизидикчи башкыларынга, дефектология, психология салбырларында өөренип турар студентилерге, аңгы-аңгы социал адырда ажылдап чоруур специалистерге, эмчилерге база ада-иелерге дефектологтуг терминнерни билдилиг ажыглаарынга ужур-дузалыг.
