Смоленск хоорайның “Юбилейный» спорт ордузунга, 23 хар четпээн аныяктар аразынга, Россияның хостуг хүреш маргылдаазы болган. Аңаа Тываның Күрүне университединиң сургуулу Чаян Монгуш чемпионнаан.
Күш-культура факультединиң бирги курсчузу Чаян Монгушка бо маргылдаа чайынналчак чедиишкин болган.
Маргылдааның кил аайы-биле тиилекчилериниң аразындан Чаян эң-не хөй — 6 сегиржип алыышкынга киришкен. Түңнелинде Тываның төлээзи удурланыкчызы Абдулмажид Кудиевке кандыг-да арга бербейн, 4:14 санга удуп алгаш, эң-не бедик чадаже үнген.
Чаян – Россияның спорт мастери, ооң тренери Айдаш Самдан.
Делегей чергелиг спорт мастери, ТКУ-нуң күш-культура факультединиң ийиги курсчузу Начын Монгуш, Кызылдың А.А. Даржай аттыг педагогика институдунуң сургуулу Денис Севидес, ТКУ-нуң күш-культура факультединиң үшкү курсчузу Сайын Казырык база шаңнал чок артпааннар.
ТывКУ-нуң идегелдиг спортчулары декабрь айда база маргылдааларга киржир. Студентилер аразынга Бүгү-российжи хостуг хүреш маргылдаазынга база Д.Г. Миндиашвили аттыг хүреш академиязының чемпионадынга, ол ышкаш декабрь 15-20 хүннеринде ТКУ-нуң чыынды командазы Нижний Новгородка маргылдаагы киржир.
