Республиканың уран чүүл школаларының театр салбырларының аразында эрттип турар “Челээш” деп мөөрейни частан тура, хамчыктыг аарыгның хайы-биле чылдырып келген. Ынчалза-даа элээди актерлар башкылары-биле бергелерге торулбайн, шиилерни белеткээш, мурнунда ышкаш сцена, көрүкчүлерниң адыш часкаашкыннары чок-даа болза, чогаадыкчы салым-чаяанныг сеткил-соруун мөөңнеп, декабрь айда эрттирген мөөрейге киришкеннер.
“Челээш” мөөрейниң бо чылын темазы – дайын болгаш уруглар. Театр салбырларының башкыларының мурнунга эң-не берге сорулга салдынган — бичии актерларның быжыкпаан сагыш-сеткилинге хора чедирбейн, дайын-чааның ажыг-човалаңын “ажып” эртери. Бирги белеткелдерде-ле уруглар дайын үезиниң чөптүг эвес бергелеринге карактарының чаштарын тудуп шыдавайн турган. Ынчалза-даа башкыларның дуржулгазы болгаш уругларга ынакшылы бергелерни шыдап эрткен. Шиилер шупту чаңгыс аай төлептиг болган: актерларның оюну-даа, сеткил-сагыш хайныышкынын дамчытканы, сцена культуразы дээш оон-даа өске. Чамдыктарының режиссер ажылын, өскезиниң сценарийи бедик деңнелдиг болганын жюри демдеглээн.
Мөөрейге назы-хар чергези-биле ийи категорияга 5 шиини көргүскен. Жюри кежигүннери уран арга күүселдезиниң деңнелиниң бедиин, режиссерларның бодалдарының бир янзылыын, башкыларның сөзүглел-биле ажылын үнелеп көрген. Башкы бүрүзүнүң аяны, өөреникчилеринге хамаарылгазы бир тускай болган.
Мөөрейниң түңнелинде Хову-Аксы уран чүүл школазы “Дайын кажан-даа катаптавас” (башкызы Марита Иргит) база Сарыг-Септиң уран чүүл школазы “Кадык бол школачы” (башкызы Татьяна Лемешонок) деп шиилери дээш бирги чаданың лауреаттары атка төлептиг болганнар.
