Бай-Тайга кожууннуң Кызыл-Даг ортумак школазында «Чурагайлыг өөредилге хүрээлели» деп төлевилел-биле ийи кабинетти негелделерге дүүштүр дерээн.
Школачыларның эң-не сонуургаар чүүлү — сенсорлуг панель. Ол ышкаш школада wi-fi коштунганы өөреникчилерге-даа, башкыларга-даа кичээлдээринге таарымчалыг. Соталыг телефоннарынга коштунуп алгаш, кичээл үезинде ажылдаар арга бар. Кайы-даа кичээлде хереглээн материалдарын тып алгаш, ону ниити сайгарып көрүп болур эптиг байдал тургустунган.
Ол кабинеттерде ниитизи-биле 50 нетбуктар, планшеттер бар. Ол планшеттер болгаш нетбуктарда шупту класстарның эртемнер аайы-биле өөредилге номнарының электроннуг хевирлерин киирген, өөреникчилер ону ажыткаш, ажылдап кириптер. Ол кабинеттиң эргелекчизи Раиса Хертек, информатика башкызы Чайзат Саая. Башкылар бо хүннерде бот-аңгылаашкында турар 9-ку классчылар-биле онлайн-кичээлдерни эрттирип турар.
