Мөңгүн-Тайганың малчыны Маруся Чамзы чыл санында Наадымга шаңнал-макталдарны чаңгыс эвес удаа ап келген. Бо чылын Наадымда ол республиканың көдээ ажыл-агый адырынга хөй чылдарда үре-түңнелдиг ажыл-ижи дээш ТР-ниң Чазак Баштыңының хүндүлел бижии-биле шаңнаткан.
Маруся Александровна Мөңгүн-Тайга кожуунда сураглыг көдээ ажыл-агый бүдүрүлгези “Мөген-Бүренниң” малчыны. Ол ажы-төлүн чааскаан өстүрүп чоруур малчын ие. Өөнүң ээзи сураглыг малчын, мөге чораан Сергек Чамзы ийи чыл бурунгаар сугга дүшкен эжин камгалап тургаш, маадырлыы-биле мөчээн.
Кызымаккай, ажыл-ишчи иениң өөрүшкүзү – ажы-төлү. Ол ажы-төлүн эрес-кежээ, эртем-билигге сундулуг кижилер кылдыр өстүрүп, кижизидип чоруур. Ажы-төлү шупту ажыл-ишке дадыккан, иезиниң дузалакчылары болган. Улуг уруу Чимис — студент, Бадыма — кинолог мергежилге өөренип алган, оглу Бады 8-ки классчы, Чинчи бо чылын 7 классче шилчээн. Хеймер кызы Чинчи шериг мергежилдиг болуксаар. Ол эң-не ажыктыг болгаш хүндүткелдиг мергежил деп санап чоруур.
Медээлер «ТуваМедиаГрупп» ИА
Чуруктарны Виталий Шайфуллин тырттырган.
