Чаа-Хөл кожууннуң Ак-Дуруг суурнуң чурттакчылары Шагаа байырлалы таварыштыр бүгү республикада чарлаттынган «Найыралдың манчызынга» киржиринден аңгыда, школа назыны четпээн болгаш эге класстар өөреникчилери ажы-төлдүг аныяк өг-бүлелер аразынга «Манчы тудуп чиилем авай!» деп акцияны база чарлаан. Аңаа шупту 21 кижиден тургустунган чеди өг-бүле киришкен.
Эң идекпейлиг өг-бүлелерниң бирээзинге, ийи ажы-төлдүң ада-иези Айдың-оол база Ольга Монгуштарны хамаарыштырып болур. Аал-оранның ээзи Ак-Дуруг суму чагыргазының даргазы, а өөнүң ишти көдээ культура бажыңының методизи. Үш уруглуг Альберт, Ульяна Көктерниң өг-бүлези база мурнакчылардан чыда калбаан. Ажы-төлдүң адазы суурда уругларның уран чүүл школазында, авазы уруглар албан черинде ажылдап турар. Найыралдыг өг-бүлелерниң кежигүннериниң чугаазы-биле алырга, мындыг хевирлиг хемчеглер ажы-төлдү ажыл-агыйга өөредиринге база аажок дузалыг.
Оон аңгыда, «Хүнчүгеш» уруглар садының коллективи «Найыралдың манчызы» деп акцияга киржип, 9 килограмм манчыны туткаш, хөй ажы-төлдүг өг-бүлелерге Шагаа таварыштыр байыр чедирбишаан сөңнээн.
