Тыва Республиканың Аграрлыг лицей-интернадының баазазынга 9 чыл дургузунда «Мээң тергиин кичээлим» деп Бүгү Россияның мөөрейин эрттирип турар. Бо удаада база республиканың гуманитарлыг эртемнер башкыларынга, ниитизи-биле республиканың 51 башкызы киришкен.
А мөөрейниң эртип турар шупту үелеринде 400 ажыг башкы киришкен. Ук лицей 2013 чылдан тура, Менделеевтиң салгалалының ачы-дуза фонудузунуң регионалдыг төлээ чери болуп турар. Ооң күүсекчи директору Россияның алдарлыг башкызы, педагогика эртемнериниң кандидады Евгений Евгеньевич Шестернинов.
Мөөрейниң жюри кежигүннери шыңгыы – филология, төөгү, педагогика эртемнериниң кандидаттары, РФ-тиң өөредилге адырының хүндүлүг ажылдакчылары, аңгы-аңгы чылдарның «Мээң тергиин кичээлим» деп Бүгү Россияның профессионал арга-мергежилиниң мөөрейиниң тиилекчилери болгаш призерлары.
«Бо хүнде республиканың удуртулгазы өөредилениң шынарын бедидеринче онза кичээнгейни угландырып турар. Келир чылды Педагог-дагдыныкчы чылын чарлааны анаа эвес. Ынчангаш Агролицейде Тываның өөредилге тергииннери чыглып келгени өөрүнчүг. Бо лицей онза, ында амыдырал шапкыны-биле чоруп турар, кезээде бир-ле солун чүүлдер болуп турар» — деп, Тываның өөредилге сайыдының хүлээлгезин күүседип турар Ирина Биче-оол онзалап демдеглээн.
Кызыл, Чөөн-Хемчик, Барыын-Хемчик, Бай-Тайга, Сүт-Хөл, Каа-Хем, Бии-Хем, Тожу кожууннарның база Ак-Довурак биле Кызыл хоорайларның школаларының киржикчилери идепкейлии-биле орус дыл болгаш литература, төрээн дыл болгаш литература, төөгү, обществознание болгаш эрге-хоойлу, даштыкы дылдар башкыларының секцияларынга киришкен.
Жюри кежигүннериниң бодалы-биле, филологтар мөөрейге бедик деңнелдиг кичээлдерни бараалгаткан. Олар өөредилгениң амгы шагның аргаларын, хевирлерин көргүзүп, өөредилгениң чаа методикаларын болгаш технологияларын, өөреникчилерниң чогаадыкчы ажыл-чорудулгазын организастаарын база информация технологияларының аргаларын база хевирлерин ажыглаарын бараалгадып көргүскен.
Республика чергелиг мөөрейниң тиилекчилери боттарының арга-мергежилин Москва хоорайга «Мээң тергиин кичээлим» деп Бүгү Россия мөөрейиниң түңнел чадазынга бараалгадыр.
По данным Минобразования РТ
Фото Минобразования РТ
