ТывКу-нуң студентизи Серен Донгак “Төрел аймактың архитектурлуг хакатону” деп төлевилелди боттандырган. Найысылал Кызылдың 106 харлаан байырлалында Аныяктар сесерлиинге ук төлевилелдиң байырлыг ажыдыышкыны болган.
Аллеяда Тывада сураглыг төрел аймактарның сүлде демдектерин сандайлардан көрүп болур. Ында Ондар, Ооржак, Күжүгет, Хомушку, Донгак, Соян дээш өске-даа сураглыг фамилияларны сиилбээни онзагай. Сандайларлыг аллея кызылчыларның дыштаныр бир онзагай черлериниң бирээзи апаар.
Төлевилелдиң киржикчилери – үндезин тыва аймактарның төлээлери “Россияның аныяктары” шаңналының акшаландырыышкыны-биле төрел-аймактарның сүлде демдектерин сандайларга оюп кылган.
Хол-биле чазап кылган чараш сандарлар найысылалдың чурттакчыларынга болгаш аалчыларынга езулуг белек болган.
Өг-бүле болгаш төрел аймактарның чаагай чүүлдерин нептередирин, аныяктарның ук-төөгүзүнге сонуургалын оттурар дээн бир кол сорулгазын төлевилелдиң удуртукчузу химия кафедразының доцентизи, химия эртемнериниң кандидады Ольга Кендиван таныштырган. Төлевилелдиң организастыг ажылдарын бойдус-география факультединиң студентилери кылган. Олар уксаа-төрел аайы-биле аймактарның төлээлерин чыгган.
Беш киржикчиден тургустунган бир командада-ла 4 аныяк төлээ база аймактан бир дагдыныкчы бар. Олар бир неделя дургузунда чогаадып кылганының түнелинде, боттарының кылган ажылдарын таныштырган. Аймак бүрүзү ыяш сандайларда сүлде демдектерин сиилбип кылган.
Төрел аймактарның өгбелери ук төлевилелдиң тургузукчулары болгаш авторларынга – бойдус-география факультединиң башкылары болгаш студентилеринге өөрүп четтиргенин илереткеш, суй белектерни сөңнээн.
