Кызыл хоорайның уруглар садтарында «Тыва дыл чаштарга» деп төлевилелдиң чорудуунуң дугайында Национал школа хөгжүдер институттуң директору, тыва дыл талазы-биле күрүне инспектору Сайзана Товуу дыңнадып турар.
– Национал школа хөгжүдер институт «Тыва дыл чаштарга» деп төлевилелди 2019 чылдан эгелеп уруглар садтарынче киирген.
Республикада 204 уруглар садтарында 22096 уруглар санындан 17685 чаштарывыс тыва дылды өөренип эгелей берген.
Тыва дылды өөредир байдалдарны тургузары-биле Национал школа хөгжүдер институт өөредилге программаларны, номнарны болгаш ийи хардан чеди харга чедир чаштарга ажылчын кыдырааштарны белеткээн.
Кызыл хоорайның 34 уруглар садында 223 бөлүктерде 4751 чаштар төрээн (тыва) дылды неделяда ийи катап өөренип турар. 21 уруглар садында аңгы тыва дыл өрээлдери ажыттынган.
Эки чедиишкин – 24 тыва дыл башкызы деп ажылчын олуттарны ажыткан. Ниитизи-биле 98 кижизидикчи башкылар тыва дылдың кичээлдерин эрттирип турар.
2019 чылда эгелээн төлевилел үре-түңнелдиг чоруттунуп турарынга өөрүвес арга чок.
Чүгле ниити уруглар садтарынче барып турар сандан 54 хуу чаштар төрээн (тыва) дылын өөренип турары – ада-иениң шилилгезиниң түңнели. Хоойлу-биле алырга кандыг дылга ажы-төлүн өөредири – ада-иениң харыысалгазы. Бо байдалды ада-иени кичээнгейлиг өөренип көөрүн диледим.
#Националшколахөгжүдеринститут #Тывадылчаштарга #Төлевилел #ТМГмедээлер #Тыва #Тывамедээ #Тывадыл #Тывамедиагрупп #Тува #Tuva #TMG #TMGNEWS #Tuvanes
